
ବ୍ୟାସନଗର ସହରର ସାପଗଡ଼ିଆ ଅଂଚଳରେ ଅଜଗର ସାପ ଆତଙ୍କ ଗୁଜବ
ବ୍ୟାସନଗର,୩୧/୦୮(ଉ. ନ୍ୟୁଜ୍ ବ୍ୟୁରୋ): ବ୍ୟାସନଗର ଅଂଚଳର ଫେରୋକ୍ରୋମ କଲୋନି ଗେଟ୍ ନିକଟସ୍ଥ ପନାସିଆ ଗ୍ରାମର ପୋଖରୀ ନିକଟରେ ଗତକାଲି ଅଜଗର ସାପ ବାହାରିଥିବା ନେଇ ଆତଙ୍କ ଖେଳିଯାଇଛି । ଯାହାକି ସମଗ୍ର ଅଂଚଳ ବ୍ୟାପି ଆତଙ୍କ ଖେଳାଇ ଦେଇଛି । ପନାସିଆ ଗ୍ରାମର ୦୨ ନମ୍ବର ୱାର୍ଡ଼ର କାଉନସିଲର କୁନି ହାଂସଦାଙ୍କୁ ଯୋଗାଯୋଗ କରିବାରୁ ଜଣାପଡ଼ିଥିଲା ଯେ ଏହା ଏକ ଗୁଜବ । କାଉନସିଲରଙ୍କ କହିବାନୁସାରେ ପନାସିଆ ଗ୍ରାମର ଦୁଇ ଯୁବକ ସ୍ନେକ ହେଲ୍ପ ଲାଇନରେ କାମ କରିବା ପାଇ ତାଲିମ ନେଉଛନ୍ତି, ତେଣୁ ଗତ କିଛି ଦିନ ପୂର୍ବରୁ ଧରା ହୋଇଥିବା ଏକ ଅଜଗର ସାପକୁ ପନାସିଆ ପୋଖରୀ ନିକଟକୁ ଆଣି ସାପ ଧରିବାର କୌଶଳ ଶିକ୍ଷା କରୁଥିଲେ । ଏହାକୁ ଦେଖିବା ପାଇଁ ସେଠାରେ ପ୍ରାୟ ୧୦୦ରୁ ଉର୍ଦ୍ଧ୍ୱ ଲୋକଙ୍କ ସମାଗମ ହୋଇଥିଲା । ଏହାକୁ କିଛି ଲୋକ ନିଜ କ୍ୟାମେରାରେ କଏଦ କରି ସୋସିଆଲ ମିଡିଆରେ ଛାଡ଼ି ଦେଇଥିଲେ । ଯାହାଦ୍ୱାରା ଏହା ସମଗ୍ର ଅଂଚଳରେ ପରିବ୍ୟାପ୍ତ ହୋଇ ଏକ ଆତଙ୍କ ସୃଷ୍ଟି କରିଥିଲା । ଆଖପାଖ ଅଂଚଳରୁ କିଛି ଲୋକ ‘ଉଦୟବଟ’ କାର୍ଯ୍ୟାଳୟକୁ ଫୋନ କରି ମଧ୍ୟ ଏହାର ସତ୍ୟାସତ୍ୟ ବିଷୟରେ ପଚାରି ବୁଝୁଛନ୍ତି । ଯାହାକି ଏକ ଗୁଜବ ବୋଲି ଜଣା ପଡ଼ିବା ପରେ ସମସ୍ତେ ଆଶ୍ୱସ୍ତ ଲାଭ କରିଛନ୍ତି । ଏହାପରେ ‘ଉଦୟବଟ’ର ସମ୍ପାଦକ ମଧ୍ୟ ବନବିଭାଗକୁ ଏବାଦରେ ପଚାରି ବୁଝିଥିଲେ କିନ୍ତୁ ବନ ବିଭାଗ ପାଖରେ ଏନେଇ କୌଣସି ସୂଚନା ନ ଥିବା ସ୍ପଷ୍ଟ କରିବା ପରେ ସମସ୍ତେ ଆଶ୍ୱସ୍ତ ହୋଇଛନ୍ତି ।