ପବିତ୍ର ରାକ୍ଷୀ ପୂର୍ଣ୍ଣିମାରେ ‘ଉଦୟବଟ’ ତରଫରୁ ବୃକ୍ଷରୋପଣ,ଦାରୁ ବ୍ରହ୍ମଙ୍କୁ ପୂଜାର୍ଚ୍ଚନା ଓ ରାକ୍ଷୀ ବନ୍ଧନ
ବ୍ୟାସନଗର,୦୯/୮(ଉ. ନ୍ୟୁଜ୍ ବ୍ୟୁରୋ): ସମ୍ବାଦଭିତିକ ପତ୍ରିକା ‘ଉଦୟବଟ’ ଏବଂ ଡିଜିଟାଲ ଚ୍ୟାନେଲ ‘ଉଦୟବଟ ଇ-ନ୍ୟୁଜ୍’ ତରଫରୁ ଆଜି ପବିତ୍ର ରକ୍ଷାବନ୍ଧନ ଅବସରରେ ପ୍ରତିବର୍ଷ ପରି ବୃକ୍ଷ ଦେବତାଙ୍କ ନିକଟରେ ପୂଜାର୍ଚ୍ଚନା କରାଯାଇଛି । ଏହି ପରୀପ୍ରେକ୍ଷୀରେ ସ୍ଥାନୀୟ କ୍ରୋମନଗର ବିଦ୍ୟାପୀଠ ଠାରେ ନିଆରେ ଢ଼ଙ୍ଗରେ ‘ରକ୍ଷାବନ୍ଧନ’ ଉତ୍ସବ ପାଳନ କରାଯାଇଥିଲା । ବିଦ୍ୟାଳୟ ପରିସରରେ ଥିବା କେତେକ ଗଛର ମୂଳକୁ ସଫା କରାଯିବା ପରେ ବୃକ୍ଷଗୁଡିକର ପୂଜାର୍ଚ୍ଚନା କରାଯାଇଥିଲା । ହାଇସ୍କୁଲ ସାମ୍ନାରେ ଥିବା ବୃହତ୍ ବଉଳ ଗଛର ପିଣ୍ଢି ଉପରେ ପ୍ରାୟ ୦୧ ଘଂଟା ବ୍ୟାପୀ ପୂଜା ଅନୁଷ୍ଠିତ ହୋଇଥିଲା । ଏଥିରେ ଓଡ଼ିଶା ଖଣି ନିଗମ ପରିଚାଳିତ ଫେରୋକ୍ରୋମ କାରଖାନାର ସାଧାରଣ ପରିଚାଳକ ରଶ୍ମିରଂଜନ ବିଶ୍ୱାଳ କର୍ତା ଭାବେ ବସିଥିବା ବେଳେ କାରଖାନା ପରିସରରେ ଥିବା ରାମ ମନ୍ଦିରର ମୁଖ୍ୟ ପୂଜକ ହରିହର ଦାଶ ପୂଜା କାର୍ଯ୍ୟ ସଂପାଦନ କରିଥିଲେ । ପରେ ଏଠାରେ ଥିବା ଅନ୍ୟ ବୃକ୍ଷ ଏବଂ ଚାରା ଗଛକୁ ପୂଜାର୍ଚ୍ଚନା କରାଯାଇ ତହିଁରେ ଫୁଲ, ଚନ୍ଦନ, ଧୂପ, ଦୀପ, ଗଂଗା ଜଳ, ହଳଦି, ଅରୁଆ ଚାଉଳ, ସିନ୍ଦୁର ଆଦି ଦେବା ପରେ ନଡିଆ ଜଳ ଦେଇ ସେଥିରେ ରାକ୍ଷୀ ବାନ୍ଧିଥିଲେ । ଏହାପରେ ବିଦ୍ୟାଳୟ ସଭା ଗୃହରେ ଅବସରପ୍ରାପ୍ତ ପ୍ରଧାନ ଶିକ୍ଷକ ସଂଜୟ କୁମାର ଦେଓଙ୍କ ଅଧ୍ୟକ୍ଷତାରେ ‘ପ୍ରାଣୀଜଗତ ପାଇଁ ବୃକ୍ଷର ଅବଦାନ’ ଶୀର୍ଷକ ଏକ ଆଲୋଚନାଚକ୍ର ଅନୁଷ୍ଠିତ ହୋଇଥିଲା । ଏଥିରେ ପରିବେଶବିଦ୍ ତଥା ‘ଉଦୟବଟ’ର ସଂପାଦକ ଦୁଷ୍ମନ୍ତ କୁମାର ରାଉତ ଅତିଥି ପରିଚୟ ଓ ସ୍ୱାଗତ ସମ୍ଭାଷଣ ପ୍ରଦାନ କରିଥିଲେ । ଏହି କାର୍ଯ୍ୟକ୍ରମରେ କାରଖାନାର ସାଧାରଣ ପରିଚାଳକ ରଶ୍ମିରଂଜନ ବିଶ୍ୱାଳ ମୁଖ୍ୟ ଅତିଥି ଭାବେ, ଝାଡେଶ୍ୱର ମହାବିଦ୍ୟାଳୟର ଅଧ୍ୟକ୍ଷ ଡ଼ଃ. ଅକ୍ଷୟ କୁମାର ପଣ୍ଡା ମୁଖ୍ୟ ବକ୍ତା ଭାବେ, ବ୍ୟାସନଗର ବରିଷ୍ଠ ନାଗରିକ ମଂଚର ସମ୍ପାଦକ ଚନ୍ଦ୍ରମଣି ସାମଲ ବିଶିଷ୍ଟ ଅତିଥି ଭାବେ, ଯାଜପୁରୋଡ ବନପାଳ ମହମ୍ମଦ ସାକିର ହୁସେନ ସମ୍ମାନିତ ଅତିଥି ଭାବେ ଯୋଗ ଦେଇ ବୃକ୍ଷର ବହୁବିଧ ଉପକାରିତା ଉପରେ ଆଲୋକପାତ କରିବା ସହ ପବିତ୍ର ରକ୍ଷା ବନ୍ଧନ ପର୍ବରେ ‘ଉଦୟବଟ’ ତରଫରୁ ବୃକ୍ଷଦେବତାମାନଙ୍କ ପ୍ରତି ଦିଆଯାଉଥିବା ଭକ୍ତିପୂତ ସମ୍ମାନର ଭୂୟସୀ ପ୍ରଂଶସା କରିଥିଲେ । ଏଥିରେ ବରିଷ୍ଠ ଶିକ୍ଷକ ମୋହନ କୁମାର ଓଝା, ମାନସ ରଂଜନ ସାମଲ, ସୁନୀଲ କୁମାର ଭୋଏ, ଅବସରପ୍ରାପ୍ତ ଷ୍ଟାଫ ନର୍ସ ଉର୍ମିଳା ନାୟକ, ବଜରଂଗ ଦଳ ଯାଜପୁର ଜିଲ୍ଲା ସଂଯୋଜକ ବସନ୍ତ କୁମାର ପାତ୍ର, ବନ କର୍ମଚାରୀ ସରୋଜ ସ୍ୱରୂପ ନାୟକ, ବିଦ୍ୟାଳୟର ପୂର୍ବତନ କର୍ମଚାରୀ ବିଜୟ କୁମାର ବେହେରା, କବୟତ୍ରୀ ସୁମିତ୍ରା ମିଶ୍ର, ବିଦ୍ୟୁତ୍ପ୍ରଭା ରାୟ, ଗୋଲାପ ମଲ୍ଲିକ, ଶ୍ରମିକ ନେତା ଅରୁଣ ଦାସ, ଅଭିମନ୍ୟୁ ବିଶ୍ୱାଳ, ପ୍ରଫୁଲ୍ଲ ବାରିକ, ଅବସରପ୍ରାପ୍ତ ଖେଳ ଶିକ୍ଷକ ସଂଜୟ କୁମାର ଦାସ, ବିଦ୍ୟାଧର ବାରିକ, ଯୁବ ସମାଜସେବୀ ଅନୂପ କୁମାର ଦାସ, ଅସିତ ଦାସ, ଚନ୍ଦ୍ରମଣି ବାରିକ, ହରଦୟାଲ ସିଂହ, ଚକ୍ରଧର ମଲ୍ଲିକ ପ୍ରମୁଖ ବୃକ୍ଷରେ ରାକ୍ଷୀ ବାନ୍ଧିବା ସହିତ ବୃକ୍ଷର ଉପକାରିତା ଉପରେ କହିଥିଲେ । ଶେଷରେ ବିଦ୍ୟାଳୟର ପ୍ରଧାନ ଶିକ୍ଷକ ରଂଜିତ୍ ମଲ୍ଲିକ ଧନ୍ୟବାଦ ଅର୍ପଣ କରିଥିଲେ ।
Loading ...
