ବ୍ୟାସନଗର ପୈାର ପାରିଷଦବର୍ଗ ଓ ନଗରପାଳଙ୍କ ସ୍ପଷ୍ଟୀକରଣ ନେଇ ସହରରେ ହଇଚଇ
ବ୍ୟାସନଗର,୦୯/୦୭(ଉ. ନ୍ୟୁଜ୍ ବ୍ୟୁରୋ): ଗତ କିଛି ଦିନ ଧରି ବିଭିନ୍ନ ଗଣମାଧ୍ୟମ, ସାମାଜିକ ଗଣ ମାଧ୍ୟମରେ କୋରେଇର ମାନ୍ୟବର ବିଧାୟକ ବ୍ୟାସନଗର ପୈାର ନିର୍ବାହୀ ଅଧିକାରୀଙ୍କୁ ଜୋର ଜବରଦସ୍ତ ଅର୍ଥନୈତିକ ଫାଇଲରେ ଦସ୍ତଖତ ମରେଇବା ଭଳି ସଂଗୀନ ଅଭିଯୋଗ ୨୦ ଜଣ ପାରିଷଦଙ୍କ ଉପରେ ଆଣିଛନ୍ତି । ଏପରିକି ବ୍ୟାସନଗର ବିଜେପି ତରଫରୁ ଏ ବାବଦରେ ଅଭିଯୋଗ ଆସିଛି ଯେ, ପାରିଷଦ ଓ ପାରିଷଦଙ୍କ ସମ୍ପର୍କୀୟ ନିର୍ବାହୀ ଅଧିକାରୀଙ୍କୁ ଖାଇବାକୁ ପିଇବାକୁ ନ ଦେଇ ଦୀର୍ଘ ୮ ଘଂଟା ଧରି ଏପରିକି ମେଡିସିନ୍ ନ ଦେଇ ମାଡ଼ ମାରିବା ଭଳି ଅଭିଯୋଗ କରିଛନ୍ତି । କିନ୍ତୁ ଏହା ସମ୍ପୂର୍ଣ୍ଣ ଭିତିହୀନ ଏବଂ ମିଥ୍ୟା ବୋଲି ଆଜି ଏକ ସାମ୍ବାଦିକ ସମ୍ମିଳନୀରେ ବ୍ୟାସନଗର ପୈାର ପରିଷଦର ନଗରପାଳ ସୁବାସ ଚନ୍ଦ୍ର ବଳ ଓ ଅନ୍ୟ ୧୯ ଜଣ ପାରିଷଦ ଜଣାଇଛନ୍ତି । ସେମାନେ ଏହି ସମ୍ମିଳନୀରେ କହିଥିଲେ ଯେ, “ଆମ୍ଭେ ପାରିଷଦମାନେ ନିର୍ବାହୀ ଅଧିକାରୀଙ୍କ କାର୍ଯ୍ୟାଳୟକୁ ଆସି ତାଙ୍କୁ ଭେଟ କରିବା ଲାଗି ଗତ ଜୁନ୍ ୨୬ ତାରିଖ ଦିନ ସକାଳ ୧୦ ଟା ୩୦ରୁ ଦିବା ୧ ଘଟିକା ପର୍ଯ୍ୟନ୍ତ ଅଫିସରେ ଅପେକ୍ଷା କରିଥିଲୁ । କିନ୍ତୁ ସେ ନ ଆସିବାରୁ ଫେରି ଆସି ପୁଣି ସେହି ଦିନ ଅପରାହ୍ନ ୩.୩୦ ମିନିଟ ସମୟରେ ନିର୍ବାହୀ ଅଧିକାରୀଙ୍କ କାର୍ଯ୍ୟାଳୟରେ ପହଂଚିଲୁ । ସାର୍ଙ୍କୁ ଚାମ୍ବରରେ ଦେଖି ସାର୍ ଆପଣ ଖାଇଛନ୍ତି କି ନାହିଁ ବୋଲି ପଚାରିଥିଲୁ । ଖାଇ ନ ଥିଲେ ବୋଲି କହିବାରୁ ସାର୍ ଆପଣ ଆଗେ ଖାଇ ସାରନ୍ତୁ, ଆମ୍ଭେ ଅପେକ୍ଷା କରିଛୁ ବୋଲି କହିଥିଲୁ । ସେହି ଅଫିସରେ ସାର୍ ଖାଇ ସାରିବା ପରେ ଆଲୋଚନା ଆରମ୍ଭ କଲୁ । ଟେଣ୍ଡର ଦୀର୍ଘ ୨୦ ଦିନ ହେବ ଆଜିକାଲି କହି ଆମକୁ କାହିଁକି ଭଣ୍ଡାଉଛନ୍ତି ବୋଲି ସାର୍ଙ୍କୁ ପ୍ରଶ୍ନ କରିଥିଲୁ । ତା’ର ଉତରରେ ସାର କହିଥିଲେ ଯେ, ଗୋଟେ ଗ୍ରିଭାନସ୍ କ’ଣ ଅଛି ଆମ୍ଭକୁ ଜଣାନ୍ତୁ । ଆମ୍ଭକୁ କହିଲେ ଯେ, ଗ୍ରିଭାନସ୍ ଆସି ନାହିଁ । ଆମ୍ଭେ ସମସ୍ତେ ବାରମ୍ବାର ପଚାରିବାରୁ କାର୍ଯ୍ୟ ନିର୍ବାହୀ ଅଧିକାରୀ କହିଲେ ଯେ, ଜଣେ କାଉନସିଲର୍ ୦୨ ମିନିଟ୍ ପୂର୍ବରୁ ଗ୍ରିଭାନସ୍ଟି ଦେଇଗଲେ । ତେବେ ଜଣକ ଗ୍ରିଭାନସ୍ରେ କାଉନସିଲର୍ ସମସ୍ତ କାର୍ଯ୍ୟକୁ ବନ୍ଦ କରାଯାଇ ପାରିବ କି ବୋଲି ପ୍ରଶ୍ନ କରିଥିଲୁ ଏବଂ ଟେଣ୍ଡର ପ୍ରକ୍ରିୟାକୁ ଆରମ୍ଭ କରିବାକୁ ଅରାଜି ହେବାରୁ ଆମ୍ଭେ ପାରିଷଦଗଣ ଶାନ୍ତିପୂର୍ଣ୍ଣ ଭାବରେ ତାଙ୍କ କାର୍ଯ୍ୟାଳୟ ସମ୍ମୁଖରେ ବସିଥିଲୁ ଏବଂ କିଛି ପାରିଷଦ ତଳେ ମଧ୍ୟ ବସି କାହିଁ ଟେଣ୍ଡର ହେଉ ନାହିଁ ତାହା ଉପରେ ପ୍ରଶ୍ନ କରିଥିଲେ । ଏହି ଆଲୋଚନା ଭିତରେ ଆମ୍ଭେ ପାରିଷଦଗଣ, ଗଣମାଧ୍ୟମ ପ୍ରତିନିଧି ଏବଂ ନିର୍ବାହୀ ଅଧିକାରୀ ମିଶି ଚା’ ପିଇଥିଲୁ । ତା’ ମଧ୍ୟରେ ସେ କେତେବେଳେ ବି ମେଡିସିନ୍ ଖାଇବା କଥା କୌଣସି ପାରିଷଦଙ୍କୁ କିମ୍ବା ପୌର କର୍ମଚାରୀଙ୍କୁ କହି ନାହାନ୍ତି । ଶେଷରେ ନିର୍ବାହୀ ଅଧିକାରୀ କହିଲେ ଯେ, ଆସନ୍ତା କାଲି ଦିବା ୧୧ଟା ବେଳେ ଆସି ଟେଣ୍ଡର କରିବେ ବୋଲି ପ୍ରତିଶୃତି ଦେବା ପରେ ଆମ୍ଭେ ଧାରଣାରୁ ହଟି ଫେରିଥିଲୁ ।
ସେତେବେଳେ ସମୟ ସନ୍ଧ୍ୟା ୭.୩୦ । ଏହାପରେ ବିଭିନ୍ନ ବୈଦ୍ୟୁତିକ ଗଣମାଧ୍ୟମରେ ନିର୍ବାହୀ ଅଧିକାରୀ ବିବୃତି ମଧ୍ୟ ରଖିଥିଲେ । ତେବେ ବିଧାୟକଙ୍କ ଅଭିଯୋଗ ଅନୁସାରେ ଆମ୍ଭେ ନିର୍ବାହୀ ଅଧିକାରୀଙ୍କୁ କିପରି ୮ ଘଂଟା ଅଟକ ରଖିଲୁ ଓ ବିଭିନ୍ନ ଅନୈତିକ ଫାଇଲରେ ଦସ୍ତଖତ କରାଇଲୁ ? ଯେଉଁ ଅନୈତିକ ଫାଇଲଗୁଡ଼ିକ ଆମ୍ଭ ଦ୍ୱାରା ଜୋର୍ ଜବରଦସ୍ତି ଦସ୍ତଖତ କରାଗଲା ବୋଲି ବିଧାୟକ ଅଭିଯୋଗ କରୁଛନ୍ତି ତେବେ ସେ ଦସ୍ତାବିଜ୍କୁ ବିଧାୟକ ସାର୍ବଜନିନ କରିବେ କି ନା ଏହା ତାଙ୍କର ଏକ ବିଭ୍ରାନ୍ତିକର ମତ । ସମସ୍ତ ସତ୍ୟ ସିସିଟିଭି ଫୁଟେଜ୍ରେ କଏଦ ଅଛି । ତାହାକୁ ସାର୍ବଜନୀନ କରନ୍ତୁ । ଯଦି ସାର୍ବଜନୀନ ନ କରିବେ ତାହାହେଲେ ବିଧାୟକ ଏବଂ ତାଙ୍କ ଦଳ ଯେଉଁ ଅଭିଯୋଗ କରିଛନ୍ତି ତା’ ପାଇଁ କ୍ଷମା ପ୍ରାର୍ଥନା କରନ୍ତୁ ବୋଲି ବିଜେଡି ପାରିଷଦ ଆଦି ଦାବୀ କରିଛନ୍ତି । ତେବେ ବ୍ୟାସନଗର ସହରର ବିକାଶର ବାଧକ କିଏ ? ? ବିଧାୟକ ନା ୨୦ ଜଣ ପାରିଷଦ ??? ଏକଥା ରାସ୍ତାଘାଟରେ ଉଙ୍କି ମାରୁଥିବା ବେଳେ ସାଧାରଣରେ ଆଲୋଡନ ସୃଷ୍ଟି କରିଛି! ଗତ କିଛି ଦିନ ତଳେ ଏମ୍ଏଲ୍ଏ ଲ୍ୟାଡ଼୍ରୁ କିଛି ନିର୍ଦ୍ଦିଷ୍ଟ ୱାର୍ଡ଼କୁ ସେ ଅନୁଦାନ ଦେଇଥିବା ବେଳେ ଅନ୍ୟ ୱାର୍ଡ଼କୁ ସେ କାହିଁକି ଉପେକ୍ଷିତ କରିଥିଲେ ? ତା’ ଉପରେ ସେ ଜବାବ ରଖିବା ଉଚିତ । ତେବେ ଏହାକୁ କ’ଣ ପକ୍ଷପାତିତା କୁହାଯିବନି ?
ପ୍ରଥମେ ଆପଣମାନଙ୍କ ଜରିଆରେ ଜଣାଇଦେବାକୁ ଚାହୁଁଛୁ କି, ଯେତେବେଳେ ୨୦୧୪ରୁ ୨୦୧୯ ପର୍ଯ୍ୟନ୍ତ ଆକାଶ ଦାସନାୟକ କୋରେଇର ବିଧାୟକ ଥିଲେ ସେତେବେଳେ ବି ବ୍ୟାସନଗର ପୈାର ପରିଷଦରେ ଅନାସ୍ଥା ଆସିଥିଲା, ଥରେ ନୁହେଁ ୩ ଥର । ସେତେବେଳେ ବି ବିଜୁ ଜନତା ଦଳର ଅଧ୍ୟକ୍ଷା ଥିଲେ ସବିତା ରାଉତ । ସେତେବେଳେ ବିଧାୟକ ଏହି ଅନାସ୍ଥା ପ୍ରକ୍ରିୟାରୁ ନିଜ ପାରିକ୍ଷଦମାନଙ୍କୁ କାହିଁକି ରୋକି ପାରି ନ ଥିଲେ । ଚଳିତ ବର୍ଷ ଆସିଥିବା ଅନାସ୍ଥାକୁ ଘୃଣା କରୁଥିବା ବିଧାୟକ ତାଙ୍କ ପାଖରେ ଶରଣ ପଶିଥିବା ବିଜୁ ଜନତା ଦଳର ପାରିଷଦମାନେ ହିଁ ଅନାସ୍ଥାର ମୂଳ ସୂତ୍ରଧର ବୋଲି ଜଣାଯାଇଛି । ତା’ର ପ୍ରମାଣସ୍ୱରୂପ ବିଧାୟକଙ୍କ ପାଖରେ ଶରଣ ପଶିଥିବା ପାରିଷଦମାନେ ଅନାସ୍ଥା ଆଣି ପୂର୍ବତନ ଅଧ୍ୟକ୍ଷା ସଙ୍ଗୀତା ପିଙ୍ଗୁଆଙ୍କୁ ପଦବୀରୁ ହଟାଇବା ପାଇଁ ଏକାଠି କରିଥିଲେ । ନବୀନ ନିବାସକୁ ଯାଇ ବରିଷ୍ଠ କାଉନସିଲର ଅଶୋକ ରାଉତ ବିଦାୟୀ ଅଧ୍ୟକ୍ଷାଙ୍କ ବିରୁଦ୍ଧରେ କୁତ୍ସାରଟନା କରିବା, ଜିଲ୍ଲାପାଳଙ୍କ ନିକଟରେ ଅନାସ୍ଥା ଦାଖଲ ଆବେଦନ କରିବା, ବିରଜା ମନ୍ଦିରରେ ପୂଜାର୍ଚ୍ଚନା କରିବା ସହିତ ମା’ଙ୍କ ଆଶିର୍ବାଦ ନେବା ଏବଂ ଅତିରିକ୍ତ ଜିଲ୍ଲାପାଳଙ୍କ ନିକଟରେ ଦସ୍ତଖତ ଯାଂଚ ଅଭିଯାନରେ ସାମିଲ ହେବା ପରେ କାହାର ପ୍ରରୋଚନାରେ ସେ ଘୋଡ଼ା ବେପାରରେ ସାମିଲ ହୋଇଥିଲେ ତାହା ଆଜି ଦିଶୁଛି ନା ଦିଶୁଛି ଗୋଡ ଦିଟା ଦିଶୁଛି ଭଳି ହୋଇଛି! ଏଥିରୁ ସ୍ପଷ୍ଟ ପ୍ରମାଣ ଯେ, ବିଧାୟକ ଘୋଡ଼ା ବେପାରରେ ସାମିଲ ଥିବା ପାରିଷଦଙ୍କୁ ନେଇ ବ୍ୟାସନଗର ବିକାଶକୁ ରୋକ୍ ଦେବା ପାଇଁ ନିଜର ପ୍ରଚେଷ୍ଟା ଜାରୀ ରଖିଛନ୍ତି! ତେବେ ବ୍ୟାସନଗର ସହରର ବିକାଶ ବିରୋଧି ବୋଲି କାହାକୁ କୁହାଯିବ? ବିଧାୟକଙ୍କୁ ନା ୨୦ ଜଣ ପାରିଷଦବର୍ଗଙ୍କୁ?
ତେଣୁ ମାନ୍ୟବର ବିଧାୟକଙ୍କୁ ଅନୁରୋଧ ମିଥ୍ୟା ଅପବାଦ ଓ ଦଳୀୟ ମନୋଭାବରୁ ଉର୍ଦ୍ଧ୍ୱରେ ରହି ବ୍ୟାସନଗର ସହରର ବିକାଶରେ ଧ୍ୟାନ ଦିଅନ୍ତୁ । ଯଦି ୧୫ ଦିନ ମଧ୍ୟରେ ବ୍ୟ।।ସନଗର ବିକାଶକୁ ତ୍ୱରାନ୍ୱିତ କରିବାକୁ ଥିବା ଟେଣ୍ଡର ପ୍ରକ୍ରିୟାକୁ ଅନୁମୋଦନ କରା ନ ଯାଏ ତେବେ ଆମ୍ଭେ ୨୦ ଜଣ ପାରିଷଦଗଣ ଆନ୍ଦୋଳନ କରିବାକୁ ବାଧ୍ୟ ହେବୁ ବୋଲି” ସେମାନେ ଏହି ସାମ୍ବାଦିକ ସମ୍ମିଳନୀରେ ଚେତାବନୀ ଦେଇଛନ୍ତି ।
Live Share Market
Loading ...
