ଅନାସ୍ଥା ପ୍ରସ୍ତାବରେ ହାରିଲେ ବ୍ୟାସନଗର ପୈାରଧ୍ୟକ୍ଷା ସଙ୍ଗୀତା, ବିଜେଡ଼ି ଓ କଂଗ୍ରେସ ମିଳିମିଶି ଅଧ୍ୟକ୍ଷାଙ୍କୁ ତଡ଼ିବାରେ ସଫଳ
ବ୍ୟାସନଗର, ୦୨/୦୪(ଉ. ନ୍ୟୁଜ୍ ବ୍ୟୁରୋ): ସ୍ଥାନୀୟ ବ୍ୟାସନଗର ପୈାର ପରିଷଦର ଅଧ୍ୟକ୍ଷା ସଙ୍ଗୀତା ପିଙ୍ଗୁଆ ଆଜି ଆଗତ ଅନାସ୍ଥା ପ୍ରସ୍ତାବରେ ହାରିଯାଇଛନ୍ତି । ଗତ ୦୬.୦୩.୨୦୨୫ରେ ଯାଜପୁର ଜିଲ୍ଲାପାଳ ପି. ଅନ୍ୱେଷା ରେଡ୍ଡିଙ୍କ ନିକଟରେ ପୈାର ପରିଷଦର ୧୧ ଜଣ ପାରିଷଦ ଅନାସ୍ଥା ପ୍ରସ୍ତାବ ଆଗତ କରିଥିଲେ । ସେମାନଙ୍କ ଦସ୍ତଖତ ଓ ବୟାନ ବିବରଣୀ ରେକର୍ଡ଼ ପାଇଁ ଜିଲ୍ଲାପାଳ ଏହି ପ୍ରସ୍ତାବ ସଂର୍ପକିତ ଚିଠିକୁ କଳିଙ୍ଗନଗର ଅତିରିକ୍ତ ଜିଲ୍ଲାପାଳ ସପନ କୁମାର ନନ୍ଦଙ୍କ ନିକଟକୁ ପଠାଇଥିଲେ । ଅତିରିକ୍ତ ଜିଲ୍ଲାପାଳ ଶ୍ରୀ ନନ୍ଦ ତାଙ୍କ ପ୍ରକୋଷ୍ଠରେ ଅନାସ୍ଥା ଆଗତ କରିଥିବା ସମସ୍ତ ୧୧ଜଣ ପାରିଷଦଙ୍କୁ ଡ଼କାଇ ସେମାନଙ୍କ ଦସ୍ତଖତ ଯାଂଚ କରିବା ସହ ସେମାନଙ୍କ ବୟାନ ରେକର୍ଡ଼ କରିଥିଲେ । ଅନାସ୍ଥା ପ୍ରସ୍ତାବ ଠିକ୍ ଥିବାର ଦେଖି ଜିଲ୍ଲା ପ୍ରଶାସନ ଆଜି ୦୨.୦୪କୁ ଭୋଟ ଦାନ ପାଇଁ ଦିନ ଧାର୍ଯ୍ୟ କରିଥିଲେ । କିନ୍ତୁ ଏହି ଆଦେଶକୁ ଚ୍ୟାଲେଂଜ କରି ପୈାରାଧ୍ୟକ୍ଷା ଶ୍ରୀମତୀ ପିଙ୍ଗୁଆ ମାନ୍ୟବର ଉଚ୍ଚ ନ୍ୟାୟାଳୟରେ ଏକ ରିଟ୍ ପିଟିସନ ଦାଖଲ କରିଥିଲେ । ମାତ୍ର ଏହାକୁ ମାନ୍ୟବର ଉଚ୍ଚ ନ୍ୟାୟାଳୟ ଖାରଜ କରି ଅନାସ୍ଥା ଭୋଟ ଗ୍ରହଣ କରିବାକୁ ଜିଲ୍ଲା ପ୍ରଶାସନକୁ ନିର୍ଦ୍ଦେଶ ଦେଇଥିଲେ । ଫଳରେ ଜିଲ୍ଲା ପ୍ରଶାସନ ଏହି ସମ୍ବେଦନଶୀଳ ଭୋଟ ଗ୍ରହଣ ପାଇଁ ଆଜି ଦିନକୁ ପୁଣି ଧାର୍ଯ୍ୟ କରି ପର୍ଯ୍ୟାପ୍ତ ପୋଲିସ ଓ ପ୍ରଶାସନିକ ଅଧିକାରୀଙ୍କ ଉପସ୍ଥିତିରେ ପୈାର ପରିଷଦର ସମ୍ମିଳନୀ କକ୍ଷରେ ଭୋଟ ଗ୍ରହଣ ପାଇଁ ସବୁପ୍ରକାରର ବ୍ୟବସ୍ଥା କରିଥିଲେ । ତଦ୍ନୁଯାୟୀ ଆଜି ପୂର୍ବାହ୍ନ ୧୧ଟା ପରେ ବିଜେଡ଼ିର ୧୬ ଜଣ ଓ କଂଗ୍ରେସର ୦୪ ଜଣ କାଉନସିଲର ଏକତ୍ରିତ ହୋଇ ଭୋଟ ଦାନ ପାଇଁ ଆସିଥିବାର ଦେଖାଯାଇଥିଲା । କଡ଼ା ସୁରକ୍ଷା ବ୍ୟବସ୍ଥା ମଧ୍ୟରେ ଭୋଟ ଅନୁଷ୍ଠିତ ହୋଇଥିଲା । ଅନାସ୍ଥା ଭୋଟରେ ଭାଗ ନେଇଥିବା ଉଭୟ ଦଳର ସମସ୍ତ ୨୦ ଜଣ ଯାକ କାଉନସିଲର ଅନାସ୍ଥା ପ୍ରସ୍ତାବ ସପକ୍ଷରେ ଭୋଟ ଦେଇଥିଲେ । ବିଜେଡ଼ିର ୦୪, କଂଗ୍ରେସର ୦୧, ବିଜେପିର ୦୧ ମୋଟ ୦୬ ଜଣ କାଉନସିଲର ଭୋଟ ଦାନରୁ ବିରତ ରହିଥିଲେ । ଅଧ୍ୟକ୍ଷାକୁ ନିଜ ପଦ ବଜାୟ ରଖିବା ପାଇଁ ୦୯ ଜଣ କାଉନସିଲରଙ୍କ ସମର୍ଥନ ଆବଶ୍ୟକ ଥିବା ବେଳେ ପୈରାଧ୍ୟକ୍ଷାଙ୍କୁ ତଡ଼ିବା ପାଇଁ ୧୮ ଜଣ କାଉନସିଲଙ୍କ ସମର୍ଥନ ଆବଶ୍ୟକ ଥିବା ସତ୍ୱେ ଆଉ ୦୨ ଅଧିକ କାଉନସିଲର ଏହି ପ୍ରସ୍ତାବକୁ ସମର୍ଥନ କରିବା ଫଳରେ ୨୦ ଜଣଯାକ ପାରିଷଦ ଆଗତ ଅନାସ୍ଥା ପ୍ରସ୍ତାବ ସପକ୍ଷରେ ଭୋଟ ଦେଇଥିଲେ । ଫଳରେ ପୈାରାଧ୍ୟକ୍ଷା ଶ୍ରୀମତୀ ପିଙ୍ଗୁଆ ନିଜ ପଦବୀ ହରାଇବା ଆଜି ସ୍ପଷ୍ଟ ହୋଇଛି । ପୈାର ରାଜନୀତି ଏବେ ଚଳଚଂଚଳ ହୋଇଉଠିଛି । ସବୁଆଡ଼େ ଏହାକୁ ନେଇ ଆଲୋଚନା ସରଗରମ ରହିଛି । ଆଗାମୀ ଦିନରେ କ’ଣ ହେବାକୁ ଯାଉଛି ତା’କୁ ନେଇ ବିଭିନ୍ନ ମହଲରେ ଉତ୍କଣ୍ଠା ପ୍ରକାଶ ପାଇଛି ।
Loading ...
