🔊 Listen to this

DIPAK RANJAN

SUB -EDITOR

UDAYABATA E-NEWS 

ଉଦୟବଟ ଓ ଉଦୟବଟ ଇ – ନ୍ୟୁଜ

ଯାଜପୁର,୧୩/୦୩ (ନି ପ୍ର): ଯାଜପୁର ଜିଲ୍ଲା ପରିଷଦ ସଭାପତି ନିର୍ବାଚନରେ କୋରାଇ ୩ ନମ୍ବର ଜୋନ୍‌ର ପ୍ରାର୍ଥୀ ନଳିନୀ ପ୍ରଭା ଯେନା ନିଦ୍ୱର୍ନ୍ଦରେ ନିର୍ବାଚିତ ହୋଇଛନ୍ତି । ରବିବାର ଜିଲ୍ଲା ଗ୍ରାମ ଉନ୍ନୟନ ସଂସ୍ଥା ସମ୍ମିଳନୀ ଗୃହରେ ଅନୁଷ୍ଠିତ ନିର୍ବାଚନରେ ଶ୍ରୀମତୀ ଯେନାଙ୍କୁ ନିର୍ବାଚନ ଅଧିକାରୀ ଦାୟିତ୍ୱରେ ଥିବା ଅତିରିକ୍ତ ଜିଲ୍ଲାପାଳ ରାଜସ୍ୱ ଅକ୍ଷୟ କୁମାର ମଲିକ ବିଜୟୀ ଘୋଷଣା କରିଥିଲେ । ପରେ ଜିଲ୍ଲାପାଳ ଚକ୍ରବର୍ତ୍ତି ସିଂହ ରାଠୋର ଶ୍ରୀମତୀ ଯେନାଙ୍କୁ ଶପଥପାଠ କରାଇଥିଲେ । ପ୍ରକଳ୍ପ ନିର୍ଦ୍ଦେଶକ ଅଶୋକ କୁମାର ବେହୁରିଆ ନବନିର୍ବାଚିତ ସଭାପତିଙ୍କୁ ପୁଷ୍ପଗୁଛ ଦେଇ ସମ୍ବର୍ଦ୍ଧିତ କରିଥିଲେ । ପୁର୍ବାହ୍ନରେ ଜିଲ୍ଲାପାଳ ଶ୍ରୀ ରାଠୋର ସମସ୍ତ ନବ ନିର୍ବାଚିତ ସଦସ୍ୟ/ସଦସ୍ୟାଙ୍କୁ ଶପଥପାଠ କରାଇବା ପରେ ନିର୍ବାଚନ ଅଧିକାରୀ ଶ୍ରୀ ମଲିକ ନିର୍ବାଚନ କମିଶନଙ୍କ ମାର୍ଗ ଦର୍ଶିକା ଆଧାରରେ ନିର୍ବାଚନ କାର୍ଯ୍ୟକ୍ରମ ଆରମ୍ଭ କରିଥିଲେ । ନିର୍ବାଚନ ପର୍ଯ୍ୟବେକ୍ଷକ ଭାବେ ବିଜୁ ଜନତା ଦଳର ଜିଲ୍ଲା ସଭାପତି ସରୋଜ କୁମାର ମହାପାତ୍ର ଓ ପୁର୍ବତନ ଜିଲ୍ଲା ପରିଷଦ ସଭାପତି ନରେଶ ଚନ୍ଦ୍ର ମହାନ୍ତି ଉପସ୍ଥିତ ରହି ପ୍ରାର୍ଥୀଙ୍କୁ ସହଯୋଗ କରିଥିଲେ । ଶ୍ରୀମତୀ ଯେନା ଦୁଇ କିତା ପ୍ରାର୍ଥୀପତ୍ର ଦାଖଲ କରିଥିବା ବେଳେ ତାହା ଯାଞ୍ଚ ପରେ ଯୋଗ୍ୟ ବିବେଚିତ ହୋଇଥିଲା । ଅନ୍ୟ କେହି ପ୍ରତିଦ୍ୱନ୍ଦିତା କରିନଥିବାରୁ ଦିବା ୧ଘଟିକା ପରେ ନିର୍ବାଚନ ଅଧିକାରୀ ଶ୍ରୀମତୀ ଯେନାଙ୍କୁ ବିଜୟୀ ଘୋଷଣା କରିଥିଲେ । ଏହି କାର୍ଯ୍ୟକ୍ରମକୁ ଜିଲ୍ଲା ପଞ୍ଚାୟତ ଅଧିକାରୀ ଅଶୋକ କୁମାର ସେଠୀ ପରିଚାଳନା କରିଥିଲେ । ଅନ୍ୟମାନଙ୍କ ମଧ୍ୟରେ ୩୯ଟି ଜିଲ୍ଲା ପରିଷଦ ଜୋନ୍‌ର ସମସ୍ତ ନବନିର୍ବାଚିତ ସଦସ୍ୟ/ସଦସ୍ୟାମାନେ ଉପସ୍ଥିତ ରହି ଶ୍ରୀମତୀ ଯେନାଙ୍କୁ ସମର୍ଥନ କରିବା ସହ ବିଜୟୀ ଘୋଷଣା ପରେ ଅଭିନନ୍ଦନ ଜଣାଇଥିଲେ ।

Live Share Market

मौषम का हाल

Delhi Weather