🔊 Listen to this

Dushmanta Kumar Rout

ଯାଜପୁର,୧୦/୪: ଚଣ୍ଡୀଖୋଲରୁ ଡୁବୁରୀ ଅଭିମୁଖେ ଯାଇଥିବା ଜାତୀୟ ରାଜପଥର ପ୍ରାୟ ୪୦ କିଲୋମିଟର ଏବେ ଲୁହାପଥର ପରି ଖଣିଜ ପଦାର୍ଥ ପରିବହନ କରୁଥିବା ଟ୍ରକ ଗୁଡିକ କବ୍ଚାରେ ରହିଯାଇଛି । ଏଥିପାଇଁ ହଜାର ହଜାର ଲୋକ ନାହିଁ ନଥିବା ଦୁର୍ଦ୍ଦଶା ଭୋଗୁଥିବାରୁ ଯାଜପୁର ଜିଲ୍ଲାପାଳ ତୁରନ୍ତ ଏଥିନେଇ ଆବଶ୍ୟକ ପଦକ୍ଷେପ ଗ୍ରହଣ କରିବାକୁ ବି.ଜେ.ଡି ନେତା ସତୀଶ ବିଶ୍ୱାଳ ଦାବି କରିଛନ୍ତି ।
ସତୀଶ ଏକ ପ୍ରେସ ବିବୃତିରେ ଜଣାଇଛନ୍ତି ଯେ, ଏହି ୪୦ କିଲୋମିଟର ରାସ୍ତାରେ ଜଣେ ପଥଚାରୀ ଚାଲି ଚାଲି ଯିବାକୁ ବି ରାସ୍ତା ନାହିଁ । ଯିଏ ଯୋଉଠି ସେଇଠି ଟ୍ରକମାନେ ସେମିତି ଦିନ ଦିନ ଧରି ଠିଆ ହୋଇ ରହିଛନ୍ତି । ସତେ ଯେମିତି ଏଠି ଆଇନ କାନୁନ କିଛି ନାହିଁ । ଗୁରୁତର ଅସୁସ୍ଥ ଏବଂ ଦୁର୍ଘଟଣାରେ ଜୀବନ ସହ ସଂଘର୍ଷ କରୁଥିବା ରୋଗୀ ଆମ୍ବୁଲାନ୍ସରେ ଆସି ସେହି ରାସ୍ତାରେ ହନ୍ତସନ୍ତ ହେବା ସହ ଜୀବନ ସହ ଲଢ଼ୁଛନ୍ତି । ନାଁ ଆଗକୁ ଯାଇ ପାରୁଛନ୍ତି ନାଁ ପଛକୁ ଯାଇ ପାରୁଛନ୍ତି । ଯନ୍ତ୍ରଣାରେ ଛଟପଟ ହୋଇ କେହି କେହି ମୃତ୍ୟୁବରଣ କରୁଛନ୍ତି । ଦୀର୍ଘ କିଲୋମିଟର ଯାଉଥିବା ବସ ବି ସେମିତି ଠିଆ ହୋଇ ରହୁଛି । ବସରେ ଥିବା କୋମଳ ଶିଶୁ ଏବଂ ବୃଦ୍ଧ ବ୍ୟକ୍ତିମାନେ ଖାଇବାକୁ ନପାଇ ବସରେ ଦିନ ଦିନ ଧରି ହତାସ ହୋଇ ମୁଣ୍ଡରେ ହାତ ଦେଇ ବସୁଛନ୍ତି । ଅନେକ ଗାଡି ଆଗକୁ ପଛକୁ ଯାଇ ନ ପାରି ରାସ୍ତା କଡରେ ଟିକେ ଖାଲି ଜାଗା ପାଇଲେ ସେଠାରେ ଗାଡି ସାଇଡ କରି ଶୋଇ ଯାଉଛନ୍ତି । ରାତି ପାହି ଯାଉଛି ହେଲେ ଯାଇ ପାରୁ ନାହାନ୍ତି । ସ୍କଲ ପିଲାଟିଏ ତାର ସ୍କୁଲକୁ ଯାଇ ପାରୁନି । ଏକ ହଜାରରୁ ଉର୍ଦ୍ଧ୍ୱ ଗାଁର ଲୋକେ ଏଥିପାଇଁ ଏକପ୍ରକାର ନାକାବନ୍ଦୀ । ସତେ ଯେମିତି ଏଠି ସରକାର, ଆଇନ କାନୁନ ବୋଲି କିଛି ନାହିଁ । ଜାତୀୟ ରାଜପଥରେ ଏଭଳି ଭିଡ ପାଇଁ କରୋନା ନିୟମ କାର୍ଯ୍ୟକାରୀ ହେଉନି । କାହା ସ୍ୱାର୍ଥ ପାଇଁ ଏଭଳି ଜଙ୍ଗଲରାଜ ଚାଲିଛି? ପାରାଦ୍ୱୀପରେ ଯେତିକି ଟ୍ରକ ମାଲ ଅନ୍‌ଲୋଡ ହେଉଛି, ସେହି ଅନୁସାରେ ମାଇନିଂରୁ ଟ୍ରକ ଲୋଡ ହୋଇ ଆସିଲେ ଏହି ଉତ୍କଟ ସମସ୍ୟା ଦେଖାଯାନ୍ତା ନାହିଁ । ଏହି ଛୋଟିଆ ସମସ୍ୟା ପାଇଁ ଲକ୍ଷାଧିକ ଲୋକେ ସମସ୍ୟା ଭୋଗିବା ସହ ସରକାର ବିରୋଧରେ ଅସନ୍ତୋଷ ପ୍ରକାଶ କରୁଛନ୍ତି । ଯାଜପୁର ଜିଲ୍ଲାପାଳ ଚକ୍ରବର୍ତି ସିଂ ରାଠୋର ତୁରନ୍ତ ଏଥିନେଇ ଉଚିତ ପଦକ୍ଷେପ ଗ୍ରହଣ କରିବାକୁ ସତୀଶ ଅନୁରୋଧ କରିଛନ୍ତି ।

Live Share Market

मौषम का हाल

Delhi Weather